Bulatlat PHMANILA, Philippines — Sinabi ng kandidato sa pagkapangulo at labor leader na si Leody De Guzman na dapat ayusin ang komposisyon ng Presidential Commission on Good Government (PCGG) upang mabawi ang “ill-gotten” wealth ng mga Marcos.
“Ayusin natin ang composition ng PCGG… I-welcome natin ang lahat ng mga information at mga inabot ng development… Dahil may alam ako na implementation na lang ang kailangan dahil may mga decision na. ‘Yun ang ating uunahin na kunin sa mga Marcos,” sinabi ni De Guzman sa 2022 Prospects Presidential Interviews na pinangunahan ng Foreign Correspondents Association of the Philippines, nang tanungin kung paano niya planong bawiin ang “ill-gotten” wealth ng mga Marcos.
Ang PCGG, na pangunahing inatasan na bawiin ang umano’y ill-gotten wealth na naipon ni dating pangulong Ferdinand Marcos Sr., ang kanyang pamilya, mga kamag-anak, at mga nasasakupan, sa ngayon ay nakabawi na ng P172.4 bilyon. Sinisikap pa nitong makabawi ng P125 bilyon pa na nasa ilalim pa rin ng paglilitis.
Sinabi ni De Guzman na naguguluhan siya kung bakit hindi pa nare-recover ang natitirang halaga.
“Hindi ko alam kung paano nangyayari na hindi nakuha ng mga nagdaang gobyerno, kung paanong ‘yung mga naka-assign na mga tao ay pumapayag na parang ‘yung delaying tactics at pagbabago ng desisyon,” aniya.
Sinabi ni De Guzman na kumpiyansa siya na malaking halaga ng “ill-gotten” na yaman ng mga Marcos ang mababawi kapag nanalo siya sa pagkapangulo sa Mayo 9 na halalan.
Bulatlat PH
